Skifahrä in Voss 1

Hallo. Letscht Mittwuch bini wie Dir gseht ds erstä Mau ga Skifahrä. Wie Dir ou gseht isch ds Wätter absolut super gsi! Ou am Schnee hets gar nüt usdssetzä gäh: Pulver vom finschtä! Ds einzigä wo chli schad isch gsi isch, dass i ha müessä allei go, wiu die Angerä äntwäder Vorläsig hei gha oder ke Skiusrüstig. Villech goni morn wider, d Wätterprognosä isch zwar nid so guet, drfür gö morn gloub ganz viu vo dä Ustuschstudäntä go schinä. Gruess und bis zum nächstä Mau!

Flöyen

Hallo
Hie wieder mau es paar Biuder vom Flöyen!

Ulriken

Hallo. Hüt hei mir ä Wanderig uf ä Ulriken ungernoh. Das isch super schön gsi, aber uf em Gipfu chaut wie die Sau! Aber es het doch de ä Belgier gha wo mit churzä Hose isch ufgloffä, und das bi minus 5 Grad und Wind!!!
Geschter Abe si mir no es Hocheymätschli vo Bergen (2. höchsti Division) go luegä. Bergen het das Spiu, wo uf erstundlech töifem Niveau isch gsi, glatt mit o zu 8 verlorä!
Gruess und bis zum nächste Mau

Hei. Gester si mir wider mau im Usgang gsi, und hüt am "Morgä" woni ufgstangä bi hei natürlech no fasch aui gschlaffä. Drum hani entschidä, schnäu chli ga ds joggen. Ig ha mir im google earth ä Rutä usägsuecht, bi aber när nöimä angers dürä wiu i die planti Rutä nid gfungä ha. Isch aber glich schön gsi! Hüt am Abe isch do im Studänteheim irä Chuchi no näs Festchen, ds Motto: 82 Tag Rägä in Serie! Hüt isch aber die Serie gloub grissä, äs isch nämlech dr ganz Tag relativ schön, ig weiss aber nid öbs letscht Nacht nid no hurti chli Niderschlag gä het und somit die Serie chönnt witer go.
Wünschä euch e gueti Zyt! Gruess

Hallo. Geschter bini ir Mittagspousä schnäu uf ä Flöyen gloffä und wie dir gseht hani sogar rächt guets Wätter verwütscht!! Dr Flöyen isch en Art Gurtä vo Bergen wo ou so näs Bähnchen ufägeit, knapp 400 Meter über Meer. Wünschä ä schönä Tag!!!

Wanderig uf ä Lövstakken

Die ersten zwei Wochen

Hoi Zäme

Wie dir gseht hani mir do ä chlini Internetsite eröffnet woni jetz mini Efahrigä cha ufschribä und ou es paar Biuder cha drufladä. Erwartit aber nid das ig jedä zwöit Tag öppis nöis schribä:-) schliesslech hei mir hie so viu Arbeit mit üsem Studium;-). Bis jetz hani erlech gseit zwar no kei einzigi richtigi Vorläsig gha, nur afang so Informationsverastautigä. Morn geits de los mit dä richtigä Vorläsigä!
Nach erä Nacht uf em Flughafä Oslo bini am 2. Januar hie in Bergen acho und diräkt is Studänteheim mis Zimmer go bezie. Am Afang isch aues no chli trist gsi wiu no fasch niemer isch hie gsi (die meistä si so im Verlouf vor erstä Januarwuchä hie izogä) und (welch Überraschung) si die ganzi Zyt gschiffet het. Wie mitlerwilä gloub die letschtä 76 Täg in Serie!!! Neue Rekord hie, dr aut Rekord lit gloub irgendwie bi 56 Täg!!!
Nach däm aber bereits es paar Stung nach mir ä Itäliäner uf mim Stock izoge isch isch när aues kes Problem me gsi!
Mir teilä hie ds 8te höch ä Chuchi, hei aber aui üses eigetä Zimmer und üses eigetä Bad. Ig teilä d Chuchi mit em bereits erwähntä Italiener, mit em nä Türk, em nä Pol, mit äm nä Norweger wo ursprünglech us Bosnie chunnt, mit ärä Australierin und mit zwöinä dutschä Medels.
Hie im Studäntäheim gids au Abe i irgend irä Chuchi ä Party und das isch bis jetz ou würklech interessant gsi wüu mä lüt us dr ganzä Wäut lehrt kennä!!!
Näb dä Partys hani aber mitlerwilä ou agfangä Sport tribä, was hie ou gar keis Problem isch, da sich öppä hundert Meter vo mim Zimmer entfährnt ä Sporthauä mit Chraftrum befindet.
Ig hoffä jetz nur no dases hie de ändlech ou chli cheuter wird, dass es wenigstens i dä Bärge ordentlech Schnee git, dass i chli cha go Skifahre!
So ig hoffä das mit däm Blog hie funktioniert, de chani de euch nämlech ou es paar Föteli presentierä!!!
Das mues jetz mau länge fürs erstä, go nämlech jetz äue de grad id Sporthauä no chli ga chügelä!

Wünschä euch no nä schönä Tag und machits guet!!!

Gruess
José, RoRo, Römu, Maddin